Rrjeta e dekriminalizimit vijon të nxjerrë në pah të shkuarën e errët të disa kryebashkiakëve që fituan në zgjedhjet njëpartiake të 2019. Edhe pse pa kundërshtarë në garë, kandidatët e PS që ”fituan” kanë probleme. Rasti më i fundit është ai i kryetarit të Bashkisë Mallakastër, ku nga verifikimi i prokurorisë del të jetë i dënuar me tri vite heqje lirie në shtetin grek, dënim të cilin ai nuk e ka deklaruar në formularin e tij të dekriminalizimit.
Në shqipëri janë dy bashki që janë pa kryetarë. Valdrin Pjetri i cili do të ishte kryebashkiaku i parë socialist në Shkodër, dha dorëheqjen pa marrë ende detyrën, për shkak të problemeve me drejtësinë Italiane që opozita zbuloi dhe denoncoi. I dyti që humbi mandatin ishte Agim Kajmaku. Një vit pasi kishte marrë drejtimin e Bashkisë Vorë, prokuroria verifikoi se ai ishte nën hetim në shtetin grek për përdorim të kartmonedhave false.
Tri vakanca të tjera janë krijuar në njësitë e qeverisjes vendore. Dionis Imeraj i Bashkisë Dibër dha dorëheqjen pasi zgjodhi ta përfaqësonte qytetin nën kostumin e deputetit duke garuar në listën e PS-së. Valbona Sako qëndroi pak kohë në krye të Bashkisë Durrës, pasi dha dorëheqjen pak ditë pas tërmetit të që shkundi nga themelet qytetin bregdetar. Bashkia e Rrogozhinës mbeti pa kryetar pasi Haxhi Memolla humbi jetën pas një arresti kardiak.
Që të gjitha këto bashki drejtohen nga nënkryetarët, përveç Shkodrës ku Voltana Ademi vijon të ushtrojë funksionin e kryetarit përtej mandatit kushtetues 4-vjeçar. Gjykata Kushtetuese preferoi të mos i përgjigjej vetë pyetjes nëse 30 qershori 2019, ku në gjysmën e bashkive pati vetëm një kandidat në fletën e votimit, ishte legjitim apo jo. Topin ia kaloi edhe një herë Komisionit të Venecias. /A2cnn/
