Dy vajza të mitura shpëtojnë nga mbytja në Golem, policia jep detajet
Dy vajza nga Elbasani kanë rrezikuar që të mbyteshin sot në plazhin e Golemit. Vajzat, njëra 10 vjeçe dhe tjetra 17-të, kanë qenë duke u larë kur rrezikuan të mbyteshin.
Fatmirësisht, ndërhyrja e pushuesve të tjerë ka bërë të mundur që ato të nxirren nga deti dhe më pas të ndihmohen nga policia dhe bluzat e bardha.
Njoftimi nga policia:
Policia, disa pushues dhe bluzat e bardha shpëtojnë 2 shtetase të mitura nga mbytja në det. Efektivët e Postës së Policisë Golem të cilët patrullojnë përgjatë vijës bregdetare në Plazhin e Golemit, në bashkëpunim me disa pushues të tjerë që ndodheshin aty, pasditen e sotme kanë shpëtuar nga mbytja 2 shtetase të mitura të moshës 10 dhe 17 vjeçe, banuese në Elbasan.
Shtetaset e mitura aktualisht ndodhen në spitalin e Durrësit jashtë rrezikut për jetën nën mbikqyrjen e mjekëve. Policia e Kavajës duke patrulluar përgjatë gjithë vijës bregdetare është e angazhuar në shërbim të pushuesve të cilët janë të lutur të telefonojnë në numrin 112 për çdo problem duke u garantuar një reagim të shpejtë dhe profesional.