Në konferencën e përbashkët mes kryeministrit Edi Rama dhe homologut, Albin Kurti në Prishtinë, u mësua se ish-drejtor i Autoritetit të Mediave Audiovizive Gentian Sala, do të koordinojë marrëdhëniet dypalëshe mes Shqipërisë dhe Kosovës.
Ai ka qenë drejtues i AMA-s prej vitit 2014 deri në vitin 2019. I diplomuar për juridik në Fakultetin e Drejtësisë, Universiteti i Tiranës, Sala ka ndjekur më pas një specializim Master për “Studime Evropiane”. Prej vitit 2004 ai mban titullin avokat, ndërsa zotëron gjuhën angleze dhe italiane.
Ajo që e lidh me Kosovën është fakti se gjatë luftës, në vitin 1999 ka qenë pjesë e grupit fakt-mbledhës të masakrave serbe ndaj popullsisë shqitpare. Ai në fakt ka një përvojë prej katër vitesh edhe në Komitetin Shqiptar të Helsinkit.
Ai do të ketë si detyrë kryesore koordinimin e komunikimit mes dy qeverive për të konkretizuar përpjekjet për forcim të marrëdhënieve mes dy shteteve. Zyrtarizimi i detyrës së tij mund të bëhet në mbledhjen e dy qeverive që do të organizohet në nëntor në Durrës.
