Teksa opozita dhe mazhoranca po ia “kalojnë topin” njëra-tjetrës sa i takon përgjimeve të antimafias italiane, i është lënë hapësirë analistëve për ta komentuar këtë situatë. Dy prej tyre, Poli Hoxha dhe Gjergji Erebara, ishin të ftuar këtë mbrëmje në studion e edicionit informativ në Ora News. Hoxha citoi se kjo çështje është e lehtë trajtueshme nga SPAK-u.
“Këtu thelbi është që kërkojnë të gjejnë fajësim tek dosja dhe përgjimet. Erjon Veliaj nuk ka dhënë leje ndërtimi në Itali, pastrimi i parave nuk ka ndodhur në Itali, por indicia që vjen nga këto përgjime, duke i shtuar dhe të gjithë këto raporte që ka dhe çka shikojmë ne me sy të lirë, që lulëzon betoni dhe kullat dhe nuk kemi ekonomi që të justifikojë këtë investim. Pra e gjithë vëmendja duhet drejtuar drejt një hetimi këtu në Shqipëri. SPAK-u e ka shumë të thjeshtë për të , pavarësisht se u intimidua sot nga kryeministri, e ka shumë të thjeshtë për të trajtuar këtë çështje. Të marrë deklarimet e pasurive të ministrave në dy mandatet e fundit, të thërriten ekspertë, të ngrihen flamurët e kuq, për ministrat që nuk deklarojnë e justifikojnë pasuritë dhe të ulën për ata që i deklarojnë”, tha Hoxha.
Ndërkohë nga krahu tjetër, analisti Erebara, doli me mendimin se paratë e “pista”, janë tepër të dëmshme për shqiptarët. Ai theksoi se pronarët e drogës, shpejt do të bëhen pronarë të vendit dhe sipas tij, pjesën tjetër të popullsisë do e trajtojë si skllevër.
“Kam përshtypjen që SPAK-u po punon fort, pavarësisht do të intimidohet apo jo nga kryeministri. Problemi është për shoqërinë shqiptare, pasi ne si shoqëri nuk e kemi kuptuar shumë mirë se me çfarë kanë të bëjnë partë e pista. Se çfarë krimi dhe degjenerimi i bëjnë qeverisë shqiptare. Duke nisur nga fakti që me punë të ndershme nuk bëhesh dot pronarë i një shtëpie, duke filluar më pas me faktin që këto para të pista, këto pronarë droge, do bëhen pronarë të vendit dhe do të na trajtojnë neve si skllevër dhe pasardhësit tanë. Këta janë problemet reale të Shqipërisë”, tha Erebara.
Discussion about this post