Aplikimet për skemën kombëtare të mbështetjes në bujqësi për vitin 2024 u mbyllën me 71.537 fermerë aplikues. Ministrja e Bujqësisë dhe Zhvillimit Rural, Anila Denaj, thotë se tashmë ka nisur procesi i vlerësimit administrativ të aplikimeve, për t’i hapur rrugë financimit.
“Synojmë t’i japim përgjigje të shpejtë dhe konkrete përmes financimit të gjithë fermerëve që plotësojnë kushtet e aplikimit”, tha Denaj. Referuar statistikave, në skemën e mbështetjes për bujqësinë aplikuan 69 510 fermerë individualë, blegtorë, bletarë, 321 grupe fermerësh dhe 21 Shoqëri të Bashkëpunimit Bujqësor, duke synuar zhvillimin e mëtejshëm të aktivitetit bujqësor dhe blegtoral dhe përfituar nga mbështetja e qeverisë.
Sipas statistikave të publikuara nga MBZHR, për masën mbështetëse blegtori, aplikuan 9288 fermerë; në bletari 4322 fermerë; në masën për inpute në serra, aplikuan 816 fermerë; bimë mjekësore dhe aromatike 954 aplikime; global gap 48 aplikime; 54255 fermerë aplikuan për naftë pa taksa dhe 169 fermerë aplikuan për ferma organike.
