Shkolla “28 Nëntori” në Shkodër ndihmë për 21 familje

Nxënësit e shkollës 28 Nëntori në Shkodër do të ndihmojnë për një vit  me pako ushqimore e veshmbathje 21 familje të varfra në qytetin verilindor.

 Ata janë të parët në këtë nismë komunitare, ndaj presin që tu bashkohen edhe nxënës të shkollave të tjera, pasi fenomeni i varfërisë është i shtrirë masivisht në kryeqendrën e veriut.

“Të bësh gjëra të vogla por me dashuri të madhe”.

Kjo thënie e shenjtores shqiptare Nënë Tereza, i ka frymëzuar nxënësit e gjimnazit 28 Nëntori në Shkodër në një nismë komunitare.

Në bashkëpunim me stafin pedagogjik e Këshillin e Prindërve ata kanë marrë në patronazh 21 familje të varfra të cilat do ti ndihmojnë për një vit me pako ushqimore

Alketa Kraja:” I bie 21 klasa 21 familje të cilat mbështeten nga gjimnazi çdo muaj me atë çfarë nxënësit e shohin të arsyeshme se munden ti ndihmojnë”.

Varfëria në shumë familje i kapërcen kufijtë e imagjinatës.

Ndaj ata presin që nismës t’i bashkohen edhe shkolla të tjera të Shkodrës e më gjerë

Arvit Faci: “Dhe ne po bëjmë  diçka për komunitetin dhe shpresojmë që dhe shkolla të tjera të na ndjekin”.

Kejsi Prroni: “Kemi arritur të kontribuojmë sado pak për ato familje siç edhe e shihni vetë është arritur një bazë e mirë materiale”.

Ky është rasti i parë që shkolla si qendër komunitare funksionon, duke dhënë edhe modelin e mirë të ndihmës ndaj më të varfërve.

Nënë Tereza thoshte: “Të varfrit na japin më shumë seç u japim ne atyre”

E ky mësim jete edhe i këtyre të rinjve duhet të shërbejë për të gjithë ata që e kanë një mundësi të kontribuojnë për nevojtarët.

/Ora News