Trafiku i kokainës, atentat shqiptarit në Ekuador

Një shtetas shqiptar ka mbetur i plagosur në Ekuador, Amerikën Latine. Dyshohet se ngjarja ka lidhje me trafikun e kokainës. Mediat vendase nuk japin emra por mësohet se shqiptari ishte i shoqëruar me një femër gjatë atentatit. Ata po udhëtonin me një makinë të blinduar në rrugët e Guayaquil-it, por gruaja që ishte me të uli xhamin për të pirë një cigare.

Atentatori me sa duket në ndjekje të shqiptarit, futi armën përmes dritares dhe qëlloi disa herë viktimën, raporton “BalkanWeb”. Atentatori kishte ndjekur automjetin e viktimës me një motor. Shqiptari i plagosur, në gjendje të qëndrueshme mjekësore.

Sipas mediave vendase, bëhet fjalë për një prishje pazari prej miliona dollarësh në trafikun e kokainës.

Ngjarja ka ndodhur pasditen e 7 nëntorit, 2017, në rrugët Tungurahua dhe Primero de Mayo, në qendër të qytetit Guayaquil. Atentati u njoftua të mërkurën nga Germán Cevallos, kreu i Zyrës Kombëtare për krime kundër jetës, vdekjet e dhunshme, zhdukje, grabitje dhe rrëmbim (Dinased) në zonën 8. Ngjarja ndodhi pak pas orës 17:00 duke alarmuar banorët e zonës. “Një femër që udhëtonte me viktimën uli xhamin e mjetit të blinduar për të pirë një cigare. Në atë kohë një person i cili e kishte ndjekur viktimën me një motor, futi armën përmes dritares dhe qëlloi disa here mbi viktimën”, tha Cevallos.

Mjeti në të cilin lëvizte viktima ishte i blinduar. I plagosuri u transferua në një klinike shëndetësore dhe pasi iu dha ndihma e pare thuhet se është në gjendje të qëndrueshme.
Viktima ka dhe shtetësi të Ekuatorit si dhe ka jetuar në vend për tetë vjet. “Viktima ishte gjithashtu objekt i një hetimi që po bëjmë për një ngjarje që ndodhi më 30 maj me një shtetas të huaj”, tha Cevallos. Atë ditë, një person tjetër me origjinë shqiptare (Ilir Hidri) u vra duke ecur në Rrugën 36 dhe Ch, në periferi të Guayaquil, nga dy individë që e qëlluan atë nga një motor.

Në një incident tjetër, policia njoftoi kapjen e Xavier S., 22 vjeç, i cili do të ishte përgjegjës për tre vrasje. Dy prej tyre ndodhën në shtator 2017, në famullinë urbane Pascuales. Krimi tjetër ndodhi në gusht, në një diskotekë në veri të qytetit. S. Xavier do të ketë lidhje me vjedhjen e një automjeti të blinduar me vlerë të madhe monetare për llogari të një kompanie transporti, parkuar jashtë një dyqani në Citadel Los Alamos, në veri të qytetit më 28 shtator 2017.
Gjurmët e gishtave të gjetura në automjet do t’i përkisnin të paraburgosurit, i cili regjistron të dhënat penale për trafikimin e substancave narkotike.