Një tjetër minorene ka denoncuar abuzimin seksual ndaj saj. Një 64-vjeçar nga Devolli është arrestuar pas denoncimit të familjarëve të 13-vjeçares. Nëna e vajzës së mitur ka treguar se ka qenë e bija që u ka treguar, pasi familjarët kishin zbuluar mesazhe në telefon. Sipas tyre i moshuari e kërcënonte vajzën se nëse tregonte do t’i vriste babanë.
“Siç më tregoi vajza, kohë më parë e kishte kërcënuar dhe i kishte thënë që po të tregonte për ngacmimet do t’i vriste babanë. Vajza më tha që më ka prekur me dorë. E njohim si bashkëfshatar, nuk kishim hyrje dalje. Ka 2 ditë vajza që më tregoi pasi kapëm mesazhet që ai i dërgonte në telefonin e gjyshit. Ne e pamë kur i ra telefoni para 2-3 ditësh, e pa kunata, por nuk tregoi se kishte burrin atje. I ra 2 herë në telefon, por ne nuk folëm. E merrte jashtë fshatit vajzën, e gënjente, i jepte lekë”, ka rrëfyer e ëma.
Ndërsa gjyshi i 13-vjeçares tha: ”Mesazhet ishin “Dil këtu, takohemi atje”, vende që i kishin frekuentuar. Është person problematik, ka qenë i dënuar në kohën e komunizmit për vrasje, ka bërë gati 18 vite burg dhe i dënuar për përdhunim të një gruaje”.
E trishtë është se si ngjarja nuk është e vetmja. Dy ditë më parë një 14-vjeçare denoncoi babain e saj për abuzim që prej moshës 10-vjeçe. Edhe pse rastet janë shtuar, shteti dhe shoqëria është në gjumë. Në media u bënë çopash për martesën e dy gocave lesbike, por për përdhunimet e vajzave minorene, askush nuk del dhe të japë zgjidhje.
