“Burgjet janë mbushur me të dënuar për vepra të lehta, jo me kriminelë”

Në të njëjtën linjë me ambasadorin amerikan dhe me atë të BE, edhe ambasadori i Britanisë së Bashkuar ka ngritur zërin se në Shqipëri personat me rrezikshmëri të lartë qëndrojnë jashtë qelive të burgut, ndërsa këta të fundit janë të mbushur me persona me rrezikshmëri më të ulët.

Në një tryezën ku u prezantua dokumentin për uljen e mbipopullimit në burgje ambasadori Cannon tha se shqetësues është fakti se burgjet janë të mbushur me shkelës ligji për vepra më me pak rëndësi në vend të shërbejë për burgosjen e individëve me rrezikshmëri të lartë shoqërore. Cannon tërhoqi vëmendjen dhe për aplikimin e dënimit me burg për vjedhjen e energjisë elektrike. Në të tilla rasti, dënimi me burgim duhet të jetë një sanksion i përdorur më rrallë.

“ Gjykatat shqiptare kanë në dispozicion një larmishmëri dënimesh alternative por ato përdoren shumë rrallë.  Ndërkohë masat e dënimit vijojnë të mbeten ekskluzivisht dënimet me burgim. Është shqetësues që vepra me rrezikshmëri  më të ulët dënohen me burgim. Është me rëndësi sepse sistemi i burgjeve është i mbipopulluar dhe i mbushur me shkelës ligji për vepra më me pak rëndësi në vend të shërbejë për burgosjen e individëve me rrezikshmëri të lartë shoqërore. Kjo do të thotë që hapësirat bëhen më të pakta dhe pakësohen burimet financiare. Arsyeja e dytë më e rëndësishme është se këto individë që burgosen për vepra me më pak rrezikshmëri mund të shkojnë drejt veprave me të rënda penale”,- tha Cannon.

Ai ka marrë si shembull dhe dënimin e personave me burg për vjedhjen e energjisë. Ambasadori tha se burgu për këtë vepër duhet të përdoret më rrallë. “Ndonjëherë nuk ka tjetër alternativë për shkelësit e ligjit. Mund të jetë rasti kur një person përsërit një vepër penale, edhe pse e një rëndësie dytësore si psh refuzon të paguajë gjobat. Një tjetër shembull është kur shkeljet bëhen mbizotëruese dhe shoqërisë duhet dhënë një mesazh se për këto shkelje do merren masa. Shembulli më i qartë në Shqipëri është vjedhja e energjisë elektrike. Në të tilla rasti, dënimi me burgim duhet të jetë një sanksion i përdorur më rrallë”,- u shpreh ambasadori britanik.