Rikthehet mesatarja, ndryshojnë kriteret e pranimit në Universitete

Matura shtetërore nuk do të sigurojë më tej  hyrje për të gjithë në Universitet. Me miratimin e ligjit të Arsimit të Lartë, ky provim konsiderohet vetëm si përmbyllës i shkollës se mesme. Për të ndjekur studimet e larta, në publik apo edhe në privat, çdo maturant duhet të ketë notën mesatare dhe kriteret që do të vendosë vetë universiteti ku ai do të studiojë. Sipas ligjit, notën e përcakton Këshilli i Ministrave, ndërsa kriteret seleksionuese të pranimit, që mund të jenë nota mesatare  apo konkursi, do ta vendosë universiteti.

Drejtoresha e Arsimit të Lartë Linda Pustina deklaroi se detajet pritet të diskutohen gjatë një takimi me rektorët e universiteteve.

Sipas draft reformës se hartuar nga grupi i  ekspertëve, vetëm maturantët me mesatare mbi 6 mund të aplikojnë për studimet e larta.  Por firma e fundit nëse ky do të jetë kufiri, a do të jetë edhe më i lartë se kaq, do të caktojë qeveria.

Universitetet e kane shprehur qarte se do të  kenë kritere të tjera seleksionuese, bazuar në reformën. Me ligjin e ri të arsimit të lartë edhe kuotat do t’i përcaktojnë shkollat e larta, duke respektuar raportet: student –pedagogë-ambiente.

Kështu pritet reduktim i pranimeve të të rinjve nga shkollat e mesme në universitete për vitin që vjen.  Madje edhe shkollat e larta do t’i nënshtrohen vlerësimit nga një agjenci ndërkombëtare.

Ministria e Arsimit me mbështetjen financiare te qeverise italiane, pas një konference që u zhvillua sot mbi këtë temë, premtoi se do të krijojë së shpejti edhe rrjetin on-line të të dhënave dhe shërbimeve në universitetet tona.

Sakaq, disa studentë kundërshtojnë reformën në Arsimin e Lartë dhe pritet të dalin sërish në p[rotestë ditën e nesërme.

Gjithsesi, është tashmë i qartë edhe perceptimi i opinioni publikut për gjendjen ku është katandisur arsimi, sidomos ai i lartë që ka dhënë masivisht diploma dhe grada shkencore pa kriter, aq sa këtyre të fundit iu ka rënë vlera dhe po “iu del edhe boja”.