Mbappe nuk kursehet fare në ankandet e bamirësisë, blen për 520 mijë euro pikturën e Pele

Sporti E Hënë, 20 Maj 2024 13:33

Lojtarët e PSG-së morën pjesë në gala-në e klubit parizien, planifikuar për të mbledhur para për fondacionin e PSG, i cili përfaqëson bamirësinë zyrtare të kampionëve të Ligue 1. Sipas “Le Parisien”, Kylian Mbappé siguroi sendin më të shtrenjtë të natës, pasi shpenzoi 520.000 euro për një pikturë të ish-futbollistit ndërkombëtar brazilian, Pelé.

Kapiteni i Francës mposhti mikun e tij të mirë Achraf Hakimi në “ankandin” për pikturën e një prej lojtarëve më të mëdhenj të futbollit në histori me një shumë që shkonte në total më shumë se gjysmë milioni euro.

Vepra artistike e legjendës së futbollit u pikturua për t’u shitur në gala-në e PSG-së vitin e kaluar, por ngjarja u anulua për shkak të incidentit tragjik të kalërimit me portierin e skuadrës pariziene, Sergio Rico.

E titulluar “O REI”, që përkthehet në “Mbreti”, nga portugalishtja, piktura u krijua nga një artist bashkëkohor francez i quajtur Alexandre Hopare. Piktura fillimisht ishte kuotuar me një çmim fillestar prej 5.000 euro.

Sidoqoftë, Hakimi dhe Mbappé ishin të vendosur për ta mundur njëri-tjetrin në këtë “ankand”, ndaj “O REI” u shit për 100 herë më shumë se çmimi i saj fillestar. Në fund, mbi 2.7 milionë euro u mblodhën për bamirësi gjatë natës.