Ten Hag me “dhimbje koke”, dëmtohet sulmuesi më në formë
![](https://kohajone.com/wp-content/uploads/2024/02/hojlund-scaled-e1708702926931-1.jpg)
Manchester United ka konfirmuar se Rasmus Hojlund do të mungojë të paktën 3 javë për shkak të një dëmtimi muskulor. Dëmtimi i 21-vjeçarit do të thotë se ai do të mungojë në ndeshjen e së shtunës ndaj Fulham, si edhe në transfertën ndaj Nottingham Forest për FA Cup.
Përveç këtyre dy ndeshjeve, sulmuesi danez mund të mungojë edhe në derbin e zjarrtë ndaj Manchester City në fundjavën e ardhshme. Ka qenë edhe vet klubi i “Djajve” që e ka bërë të ditur këtë lajm.
“Rasmus Hojlund do të mungojë në ndeshjen e Manchester United në Premier League kundër Fulham të shtunën për shkak të një dëmtimi muskulor. Lëndimi pritet që ta mbajë jashtë për dy deri në tre javë”, thuhej në njoftim.