Emri i Arta Vorpsit u fut kontrabandë në Fletoren Zyrtare

Presidenti Ilir Meta u shpreh se është gati të organizojë ceremoninë e betimit për betimin e anëtarëve të Gjykatës Kushtetuese, por vetëm për ata që janë zgjedhur në mënyrë të ligjshme.

Kujtojmë se Vorpsi njihet nga Kuvendi si anëtare e Gjykatës Kushtetuese, por në vend të saj Meta ka dekretuar Marsida Xhaferllarin. Meta tha se nuk mund të detyrojë presidentin një publikim kontrabandë, siç ai cilësoi publikimin në Fletoren Zyrtare të emrit të Arta Vorpsit.

“Jam shumë i qartë për këtë çështje. Kuvendi është i mirëpritur të komunikojë zyrtarisht me institucionin e Presidentit, dhe jemi të hapur për të bashkëpunuar në respekt të Kushtetutës dhe detyrimeve kushtetuese dhe kjo është një çështje e mbyllur dhe shumë e qartë.

Ju duhet të dini se çfarë publikohet në fletoren zyrtare dhe këto janë me ligj, çdo publikim kontrabandë, padyshim që nuk sjell asnjë detyrim për presidentin në zbatim të detyrimeve të tij kushtetuese”, – tha Meta.