1/3 e territorit e mbjellë me kanabis, Voda ”sulmon” median ”Rai 3”

”Udhëtim në zemër të shpërndarjes së drogës në Shqipëri”. Ky është titulli i një reportazhi për Shqipërinë nga ”Rai 3”. Programi ”Narcotica” i Tg3 ka ardhur në Shqipëri, ku dy realizuesit, Valerio Cataldi dhe Raffaella Pusceddu, kanë sjellë mbrëmjen e kaluar historinë e drogës në Shqipëri duke nisur nga Lazarati dhe deklaratat e prokurorit italian.

Zv/ministrja e Brendshme, Rovena Voda, i cilëson të pavërteta gjetjet e dokumentarit të “Rai 3″, sipas të cilit 1/3 e sipërfaqes së Shqipërisë është e mbjellë me kanabis. Sipas Vodës, ky është thjesht një lajm mediatik. ”Duhet përgëzuar puna e policisë, janë pakësuar sipërfaqet me kanabis”. Nga ana tjetër, Voda ka deklaruar se nuk kanë të dhëna që mafia afgane drejtohet nga persona shqiptarë. ”Është bërë luftë e madhe dhe nga Policia e Shteti janë venë në pranga dhe persona të famshëm”.

Gazetari italian Valerio Cataldi e mbylli dokumentarin e titulluar “Narcotica” me një udhëtim në Shqipëri, ku për 5 javë rresht ka rrëfyer trafikun e drogës në trekëndëshin Meksike-Kolumbi-Shqipëri e me destinacion Italinë dhe Europën.

Sipas dokumentarit, grupet kriminale shqiptare janë fuqizuar ndjeshëm në trafikun e lëndëve narkotike, aq sa po kërkonin të blinin një nëndetëse për të të kaluar kokainën e ardhur prej Amerikës së Jugut përmes Mesdheut. Ndër të tjera thuhet se në vitin 2017 në Shqipëri u reduktua ndjeshëm kultivimi i kanabisit, por së fundi ka një rritje të madhe të sipërfaqeve të mbjella më kanabis.