1 muaj pas tërmetit, specialistët: Nuk ka më rrezik

Një muaj nga tërmeti i madh i 26 nëntorit, duket se lëkundjet e tokës nuk kanë përfunduar, pasi gjatë kësaj kohe janë shënuar 2.200 tërmete. Sizmologët thonë se aktiviteti sizmik është në zhvillim e sipër, ndërsa gjeografët shtojnë se sa më shpesh të ndodhin lëkundjet e lehta, aq më gradualisht çlirohet energjia. Kur ka kaluar një muaj nga tërmeti i 26 nëntorit, toka duket se nuk ka gjetur qetësi, pasi lëkundjet vijojnë, ndonëse magnituda e tërmeteve ka qenë e vogël.

“Deri me sot kemi me tepër se 2200 ngjarje. Thyerja tektonike që ka gjeneruar lëvizjen sizmike nuk është stabilizuar ende, ka një moment qetësimi por nuk është çliruar e gjithë energjia”, thotë sizmologu Rexhep Koçi. Aktivitetet sizmike kanë aktivizuar edhe gjeografët, të cilët kanë studiuar aktivitetin e tokës. Pak ditë më parë, njëri prej tyre tha për A2 CNN se nuk duhet të druhemi nga tërmetet e vegjël.

“Këto lloje thyerjesh janë të zakonshme në territorin e Shqipërisë, dhe sa më shpesh ndodhin lëkundjet, aq më gradualisht ndodh çlirimi i energjisë”, tha për A2 pedagogu Romeo Hanxhari. Sizmologët vijojnë matjet e lëkundjeve të tokës, ndërsa duket se magnituda e tërmeteve ka qenë në rënie, ndonëse numri i tyre është ende i lartë.