12 mld lekë sigurime të papaguara, KLSH: Tatimet nuk kanë dërguar në ISSH 1.4 milionë listëpagesa

Rreth 12 miliardë lekë është borxhi i krijuar nga debitorët për kontribute të papaguara të punonjësve. Shifra është evidentuar në raportin e auditit të publikuar së fundmi nga Kontrolli i Lartë i Shtetit, i cili nënvizon se  Drejtoria e Përgjithshme e Tatimeve nuk ka dërguar në Institutin e Sigurimeve Shoqërore 1,4 milionë listë-pagesa.

Ndërkaq, KLSH duke marrë në analizë sektorin e sigurimeve shoqërore për periudhën 2015-2018, evidenton gjithashtu se mungon një shërbim cilësor në drejtim të  qytetarëve, duke mos iu vënë në dispozicion të gjithë informacionin e nevojshëm dhe duke reflektuar vonesa dhe tejkalim afatesh në lidhjen e pensioneve. Sipas KLSH, procedura e lidhjes së pensionit është burokratike dhe me afate të tejzgjatura dhe të pajustifikuara. Kontrolli i Lartë i Shtetit ka dalë në konkluzionin se reforma e vitit 2014, e ndërmarrë në fushën e sigurimeve shoqërore nuk ka qenë efektive.

“Kjo reformë paraqitet e vakët, pasi nuk pasqyron ndryshime thelbësore të ligjit ekzistues dhe nuk ka reflektuar zgjidhje për problematikat e konstatuara përpara hartimit të saj. ISSH nuk ka një strategji institucionale dhe plane veprimi, si dhe nuk disponon një rregullore të brendshme në përputhje me strukturën organizative”, thuhet në raport. 

/SCAN