1,3 ton kokainë, SPAK: Ngarkesa kaloi tranzit

Pas kapjes së 1,3 ton kokainë në Maqedoninë e Veriut, Prokuroria e Posaçme Antikorrupsion konfirmoi se ka qenë në dijeni të kalimit të kamionit në territorin shqiptar. SPAK ka bërë me dije se ata kanë mbikqyrur tranzitin e drogës me kërkesë të të huajve. ”Ngarkesa kaloi tranzit në Shqipëri, nuk ka lidhje me vendin tonë. Kalimi i kontrolluar i ngarkesës me kokainë ishte pjesë e hetimit për të zbardhur rrjetin e trafikut”, thanë prokurorët të cilët pranuan se prokuroria shqiptare ka bashkëpunuar me autoritetet e huaja për hetimin dhe dokumentimin e këtij trafiku.

Sipas tyre, kamioni me kokainë ka hyrë në Shkodër nga Mali i Zi dhe ka dalë në Pogradec drejt Maqedonisë së Veriut, ndërsa destinacioni i drogës ka qenë në Maqedoni dhe se nuk ka shqiptarë të përfshirë. Lënda narkotike është sinjalizuar që në Itali, prej ku autoritetet atje kanë bërë zëvendësimin e kokainës me një lëndë tjetër, duke mbajtur nën vëzhgim kamionët, për të zbuluar destinacionin e tyre.

Pasi kanë hyrë në Hanin e Hotit, mjetet i janë drejtuar pikës kufitare të Qafë Thanës, në Pogradec, duke kaluar në Maqedoninë e Veriut, aty ku u bë edhe ndërhyrja e autoriteteve. Në aksion u përfshinë DEA Amerikane, Guardia di Finanza, policia shqiptare dhe policitë e vendeve të tjera të rajonit.

3 të arrestuar janë deri më tani nga aksioni i policisë në Krushopek të Sarajit për kapjen e 1.3 ton kokainë. Në këtë aksion të mirëorganizuar kanë qenë në dijeni të ngarkesës policia italiane si dhe ajo shqiptare që kanë marrë pjesë në aksion. Informacionet e para thonë se kokaina fillimisht ka ardhur nga Amerika në Bar (Mal i Zi) e duhej të përfundonte në Koper (Slloveni).

Për arsye të panjohura për momentin, destinacioni është ndryshuar dhe kokaina ka përfunduar në Krushopek. Kur ka hyrë në Shqipëri, policia e ka vrojtuar, në rast se kokaina do shkarkohej në vend. Kamioni ishte me targa maqedonase ndërsa në Shqipëri nuk ka ndaluar.