15 vrasje pa autorë, PD kërkon shpjegime por ministri Çuçi hesht

”Çfarë është kjo rokadë mes drejtorëve të policisë. Ç’ështe kjo histori. Krimi godet në Fushë Krujë dhe drejtorin e vendosin në Durrës. Kur t’i mbarojë vaji kandilit, nuk është etike. Kërkoni ndjesë”, kështu u shpreh nënkryetari i Komisionit të Sigurisë, Ferdinand Xhaferraj në mbledhjen e sotme.

Nga ana tjetër, i shkarkuari nga Basha si nënkryetar i këtij Komisioni, Flamur Noka tha se kemi një polici të zhytur në krim, në drogë. Për të e gjithë kupola është e inkriminuar.

”Agjencia e mbikqyrjes të kishte eficencë absolute, por historia ka treguar se kupola e policisë është kriminalizuar nga politika. Po qarkullojnë titullarët, të cilët dikur janë hequr se kanë dosjen sa një mal të përfshirë në krim, në afera e trafik, riciklohen përsëri nëpër disa drejtori, kjo tregon ose keni ezauruar çdo kapacitet ose kupola është e gjitha e inkriminuar dhe ju thoni ky është më pak, ky është më shumë”.

Ministri i Brendshëm, Bledi Çuçi nuk pranoi të komentonte. Në të gjithë vendin janë 15 ngjarje kriminale të pazbardhura dhe në asnjërën prej tyre hetimet nuk kanë nxjerrë të dyshuarit.