“160 shqiptarë në ditë humbën punën që prej fillimit të vitit”. Tabaku publikon shifrat: Qeveria bën propagandë boshe
Ish-deputetja e Partisë Demokratike Jorida Tabaku publikon shifrat negative që shkaktoi pandemia e koronavirusit në vendin tonë, ku sipas saj, 117 biznese në ditë janë detyruar të mbyllin aktivitetin e tyre.
Përmes një reagimi në rrjetet sociale, Tabku thekson se teksa qeveria bën propagandë boshe, 160 shqiptarë në ditë humbën punën që prej fillimit të vitit.
“Në mesin e pandemisë dhe Ramavirusit që po shkatërron ekonominë, shqiptarët kanë dëgjuar por se kanë provuar ndikimin e paketës së ndihmës nga qeveria. Boritë e propagandës buçasin fort në përpjekje për të mbytur zërin e qytetarëve që po varfëron dhe bizneseve që po falimentojnë. Por është e pamundur të fshihet papunësia, varfëria dhe ulja e qepenave.
160 shqiptarë në ditë humbën punën që prej fillimit të vitit. 177 biznese mbyllen çdo ditë dhe këto janë vetëm shifrat zyrtare. Po të llogarisim dhe punonjësit e informalitetit, numri i familjeve shqiptare që nuk kanë mundësi të ushqejnë fëmijët e tyre është i frikshëm për një vend europian. Kësaj të vërtete të hidhur dhe të dhimbshme qeveria shqiptare i është përgjigjur me pagesat e koncensioneve dhe PPP-ve, me amnisti fiskale të parave të krimit dhe me vjedhjen e çdo fondi të mundshëm për rindërtimin.
Ne ofruam planin tonë për të shmangur thellimin e krizës gjatë pandemisë. Për të rialokuar 120 milionë euro destinuar PPP-ve për 2020 që t’iu shkonin shqiptarëve. Propozuam heqjen e taksave për këtë vit krize. Kërkuam të mbështetej konsumi dhe incentivat për të shpenzuar qytetarët.
Por qeverisja e rilindjes dështoi dhe sa herë kopjoi e bëri gabim. Tradhtuan shqiptarët, sepse e kanë jetën e lidhur me oligarkët.
Shqipëria ka potenciale dhe mundësi të rimëkëmbet vetëm me një plan serioz në shërbim të qytetarëve dhe bizneseve. Kriza ka vetëm një rrugëzgjidhje: Projektin ekonomik të PD-së. Shqipëria në punë është synimi jonë”, shprehet në reagimin e saj, ish-ligjvënësja e PD-së, Jorida Tabaku.
