17 deputetët ”gojëkyçur”, listën e kryesojnë të PS-së

Listës së deputetëve më të suksesshëm dhe atyre më aktiv në debatet parlamentare, u shtohet edhe lista problematika e deputetëve që nuk kanë regjistruar asnjë fjalim në parlament gjatë tetë muajve të vitit 2018. Konkretisht, nuk kanë folur asnjëherë në parlament gjatë sesionit të fundit parlamentar 10 deputetë të PS, deputeti Bitri i LSI që iu bashkua PS, 2 deputetë të LSI, 2 të PDIU, Ndoka i PDK, si dhe deputeti Doshi, tashmë zyrtarisht deputet i PSD.

Ndonjë nga deputetët me tregues negativ në fjalime (p.sh, Fino) ka qenë mjaft aktiv në punën e komisionit të çështjeve ligjore ose në komisionin e posaçëm të reformës zgjedhore, ndërkohë që në listë ka edhe ndonjë deputet (Sterkaj), i cili për arsye shëndetësore ka munguar një pjesë të sesionit parlamentar, apo Braho, i cili hyri në parlament në muajin maj në vend të ish-Ministrit të Brendshëm Tahiri.

Në listë bën pjesë kryetari i një partie politike (Ndoka, PDK), si dhe deputetë si ai me përvojë të gjatë parlamentare (siç janë Fino, Braho apo Tavo), siç ka edhe individë të zgjedhur në legjislaturën e fundit, kryesisht prurje pa formatim politik të caktuar.

Siç shihet nga tabela, nga 17 deputetët me 0 diskutime në parlament ka vetëm një deputete femër dhe 16 janë meshkuj, dhe se individë që kanë sukses në drejtimin lokal apo që sigurojnë mandate në zona bastione partiake apo personale, nuk tregojnë minimumin e kujdesit dhe shqetësimit për të përfaqësuar zgjedhësit e tyre në organin kryesor përfaqësues e kushtetues në vend, Kuvendin e Shqipërisë.