18 muaj për zbulimin e vaksinës? Virologu: Testimi për efektet anësore

Bota është më sytë tek shkencëtarët dhe tek vaksina që do të luftojë këtë Covid-19. Arban Domi drejtor i zhvillimit të vaksinave në Geovax dhe virologu që po ndjek zhvillimet më të fundit sa i takon përpjekjeve për të zbuluar vaksinën kundër virusit në SHBA, thotë se duhen të paktën 18 muaj për zbulimin e vaksinës. Nga ana tjetër, ai theksoi se kjo kohë nevojitet për të kryer përgatitjen në laborator, testimet e nevojshme tek kafshët si dhe më pas testimi për efektet anësore.

“Përgatitja e një vaksine kërkon kohën e vet, përgatitet në laborator, testohet te kafshët dhe më pas testohet tek njerëzit. Nëse do të jemi të suksesshëm do të duhet një vit e gjysmë duke qenë optimist, pasi mund të marrin dhe më shumë”, deklaroi ai për ‘Ilva Now’.

Doktori u shpreh se në kohë normale për zbulimin e një vaksine kërkohen nga 5 deri në 15 vjet. Procesi më i rëndësishëm në zbulimin e vaksinës është testimi për efektet anësore pasi ato mund të jenë më të rrezikshme se sa vetë virusi. “Në përgjithësi një vaksinë do nga 5 deri në 15 vjet. Përcaktimet e fillimit se mund të gjendej më shpejt ishte më shumë për të qetësuar njerëzit. Për Sars-1 ende nuk kemi një vaksinë. Shpresojmë se ky virus të jetë më i ndryshëm dhe të mos shkohet tek hapat sekondare”.