22-vjeçarja në garë për deputete, vëmendjen tek kauzat e të rinjve

Në votimet e së dielës, qytetarët me të drejtë vote në qarkun e Durrësit, në listën e kandidatëve kanë edhe emrin më të ri, atë të 22-vjeçares Andia Ulliri. Ajo renditet e 6-shta në qarkun e Durrësit, në zonën e Fushë-Krujës. Ajo thotë se do të jetë zëri i të rinjve në parlament.

“Vendosa të kandidoj sepse sot shoh që të rinjtë dita ditës e kanë humbur shpresën për të qëndruar në vendin e tyre dhe mendoj që ka ardhur koha që ne të bëjmë një ndryshim. Ka ardhur koha që ne t’i mundësojmë çdo të riu e të reje shqiptare, të gjejë shpresën në vendin e tyre pa u dashur të investojnë për t’u larguar nga Shqipëria. Premtoj që do t’i përfaqësoj denjësisht në parlamentin shqiptar dhe që do jem zëri i tyre në çdo kohë”, thotë Andia Ulliri.

Duke jetuar me realitetin e zonës ku kandidon, Ulliri tregon se çfarë synon të përmirësojë me marrjen e mandatit të deputetes. “Zona e Fushkrujës sot karakterizohet nga industria e prodhimit të mobiljeve, ku gjatë 8 viteve të fundit është lënë në harresë. Me programin e PD-së dhe aplikimin e taksës së sheshtë, kjo zonë do të ofrojë qindra vende pune, duke e kthyer në një zonë të mirfilltë industriale ”, shprehet ajo.