4 kompanitë e Becchettit i kalojnë shtetit, prokurori holandez: Drejtësia u bë
17 vite burg ka dhënë Gjykata e Tiranës për biznesmenin Francesco Becchetti. Për akuzat e pastrim parash dhe vjedhje duke shpërdoruar detyrën. Becchetti krijoi një sistem shoqërish tregtare, me qëllim fshehjen e veprimtarisë kriminale. Në këtë sistem është përfshirë i pandehuri Becchetti, duke futur në këtë marrëdhënie nënën Lilliana Condomiti dhe vjehrrën e tij Vjollca Kamberi.
Sipas Gjykatës, asetet e tyre dhe llogaritë bankare të shoqërive do kalojnë në favor të shtetit. Përveç Bechettit, Gjykata dënoi edhe mamanë dhe bashkëpunëtorët e tij.
Liliana Condomitti-8 vite burg
Mauro De Renzis-16 vite burg
Erjona Troplini-8 vite burg
Stavri Peçi-2 vite burg, pezullim në shërbim prove
Fetah Dervishi-3 vite burg, pezullim në shërbim prove
Procesi u ndoq edhe nga prokurori holandez Ben Swagerman, i cili ka asistuar në këtë çështje. Pas vendimit ai tha se drejtësia më në fund u dha. Gjykata ka vendosur edhe që 4 kompanitë e sekuestruara Becchettit, konkretisht për “Energji” sh.p.k. “Cable System” sh.p.k, “400 KV” sh.p.k dhe “Agon Set” sh.p.k i kalojnë shtetit. Biznesmeni Francesco Beccheti, prej kohësh është një temë debati politik në Shqipëri, ku vijon të jetë në arrati dhe për të ka një mandat arresti ndërkombëtar.
