69-vjeçari vret me çekiç partneren, krimi për 6 mijë lekë

Bashkëjetesa e Bashkim Telit dhe Suzana Shumanit, ose siç fqinjtën i njihnin si ”çifti i lumtur”, përfundoi në mënyrë tragjike. 69-vjeçari e vrau gruan me çekiç, pas një debati për 6.000 lekë të harxhuara në dy ditë.

Të paktën ky është deklarimi i parë pasi u vu në pranga. Ngjarja u regjistruar rreth orës 01:00 pas mesnate. Debati me tone të ashpra zgjoi fqinjët që njoftuan policinë. Teli mësohet se tentoi të largohet nga vendngjarja, por nuk ka bërë rezistencë kur u përball me forcat e policinë që kishin mbërritur shpejt në vendngjarje.

Vrasja i ka tronditur fqinjët që thonë se i njihnin si cift të qetë dhe pa probleme ”Ata kanë dalë me shëtit dorë për dore me njëri-tjetrin, madje unë vetë i kam thirrur “çifti i lumtur”. Bashkimi ka qenë tipi i qetë, është për tu habitur që të bëjë këtë krim”,-shprehen ata.

Teli është baba i dy vajzave të rritura, i ve dhe për të shkolluar vajzat i kishte ndjekur në Tiranë, ku ishte njohur me Suzana Shumanin edhe ajo nënë me fëmijë. Disa vite më parë ishin rikthyer në Shkodër.