690 qytetarë u kapën pa maska, dy të tjerë u gjobitën me nga 5 mln lekë për protestën në Dibër

Me masë administrative 3.000 lekë janë ndëshkuar 690 qytetarë që u konstatuan pa maskat mbrojtëse, kurse me nga 5.000.000 lekë, janë ndëshkuar 2 shtetas pasi organizuan grumbullim dhe manifestim të paligjshëm në Dibër. Masë administrative 1.000.000 lekë për administratorin e një subjekti që u konstatua duke ushtruar aktivitetin në kundërshtim me protokollet e sigurisë.

Strukturat e Policisë, krahas përmbushjes së detyrave funksionale për parandalimin, evidentimin dhe goditjen e paligjshmërisë, kanë vijuar kontrollet në terren në të gjithë vendin, për të monitoruar zbatimin e masës së re për parandalimin e përhapjes së Covid-19, mbajtjen e detyrueshme të maskës mbrojtëse, e cila është detyrim për të gjithë qytetarët, që në momentin që dalin nga shtëpia.

Si rezultat i këtyre kontrolleve, gjatë 24 orëve të fundit, në të gjithë vendin, Patrullat e Përgjithshme dhe ato të Policisë Rrugore kanë evidentuar dhe ndëshkuar me masën administrative 3.000 lekë secili, 690 qytetarë që janë konstatuar duke lëvizur pa maskat mbrojtëse.