8 viktima për 4 ditë/ Drejtori i Policisë Rrugore: Javë sensibilizuese, kufiri maksimal i shpejtësisë 30 km/orë

Viktimat nga aksidentet rrugore mbeten në shifra të larta edhe për vitin 2021, aq sa mund të jenë më shumë sesa nga Covid-19. Në raportin e INSTAT, thuhet se në 4 muajt e parë të 2021 kanë humbur jetën nga aksidentet 70 viktima, 30% më shumë se përiudha janar-prill e vitit 2020.

Kjo javë e sigurisë rrugore ka prodhuar një bilanc tragjik me 8 viktima për 4 ditë nga aksidentet rrugore. Drejtori i Policisë Rrugore, Mitat Tola përmes një postimi në rrjete sociale, thotë se 17-24 maj 2021 është zgjedhur “UN Global Road Safety Week” si java e 6-të Globale e Sigurisë Rrugore. Fushata sensibilizuese një javore, thotë ai, e ka theksin tek mesazhi që rrugët duhet të kenë të kufizuar shpejtësinë e lëvizjes 30 km/orë.

”Kjo nismë globale përqafohet edhe nga aktorët kryesorë të sigurisë rrugore në Shqipëri. Policia Rrugore këtë javë veç pjesëmarrjes në aktivitete, është e pranishme më shumë në zonat urbane, në lagjet e brendshme të qyteteve ku është sanksionuar me ndryshimet e Kodit Rrugor, kufiri maksimal i shpejtësisë 30 km/orë. Lëvizja me 30 km/orë mundëson që rrugët të jenë më të sigurta, më të gjelbërta dhe më të jetueshme”, thotë ai.