Zbulohet dokumenti. A ishte e paralajmëruar vdekja e kryekomisarit?

Një nga viktimat e 26 nëntorit është edhe kryekomisari Bajram Hajdarmataj, i cili gjeti vdekjen në rrenojat e shtëpisë së pushimit numër 4 në Kavalishencë. 54 vjeçari ndodhej ne Durres, si pjesë e ekipi trajnimi për forcat e rendit. Por a ishte paralajmëruar rreziku për këtë godinë nga ana e inxhinierëve pas tërmetit të 21 shtatorit 2019? Mazhoranca e mohon. “Godina e ministrisë së Brendshme nuk ka pasur dëmtime nga tërmeti i 21 shtatorit” shprehej Rovena Voda pas tërmetit të datës 26 nëntor.

Por “Ora News” disponon një dokument të firmosur nga grupi i inspektimit prej 4 inxhinerësh, në të cilin thuhet qartë se “Hoteli i ri i Shtëpisë së Pushimeve në Durrës”, referuar godinës numër 4, nuk paraqet dëmtime në konstruksionin mbajtës të tij, por ai aktualisht është i pashfrytëzueshëm pasi copat e tullave dhe të suvave mund të shkëputen dhe të shkaktojnë aksidente në njerëz. Sipas këtij dokumenti, pas tërmetit të 21 shtatorit, objekti kishte nevojë për rikonstruksion të muraturës dhe ky alarm i ishte komunikuar edhe drejtorit të këtij institucioni.

Fatkeqësisht shqetësimi i grupit të inspektimit, që nuk u mor parasysh në kohë, i mori jetën kryekomisarit, pasi një pjesë e godinës u shemb për shkak të tërmetit të dytë në 26 Nëntor. Por në godinën numër 5, natën e 26 nëntorit kanë qënë edhe studentë të akademisë së policisë dhe trajnerë, që fatmirësisht nuk kanë pësuar dëmtime.

Për shkak të kësaj situatë dhe pikëpyetjeve të ngritura për këtë rast PD ka kërkuar informacion zyrtar qeverisë shqiptare, lidhur me verifikimet e kryera në Godinën Nr. 4 të Shtëpisë së Pushimit të Ministrisë së Brendshme në Kavalishenca të Durrësit, e cila u shkatërrua në tërmetin e datës 26 Nëntorit ku humbi jetën kryekomisari Bajram Hajdarmetaj.