Adoleshenti 2 muaj i zhdukur, iku në shkollë me orë dhe flori në vlerë 10 milionë lekë

Dy muaj pas zhdukjes së djalit 16-vjeçar, nëna e Mariglen Gjonajt bën apel për gjetjen e të birit, ndërsa akuzon policinë për neglizhencë.

Luljana Gjonaj: “Kemi shkuar disa herë në polici, policia nuk na tregon dosje, cfarë është shkruajt në dosje. Dy muaj djali im është i humb është nën tokë apo sipër toke unë nuk e di. Kam shkuar tek prokurori i përgjithshëm dhe më datën 18 qershor i kam dërguar një letër ankese, që polica e Laçit dhe Lezhës nuk po bëjnë asgjë. Nuk kam asnjë shpresë as nga Laçi as nga Lezha”

Me lot në sy Luljana Gjonaj tregon për 18 majin, ditë kur e pa për herë të fundit djalin e saj, ndërsa hedh dyshimet se mund të jetë grabitur.

Luljana Gjonaj: “Ka pasur një orë ‘roleks’, ka pasur varse të cilat së bashku kapnin vlerë e rreth 10 milionë lekëve. Iku në mëngjes doli në orën 08:00 për të shkuar në shkollë. Gjithë natën duke kontriolluar për djalin. Nuk i dua florinjtë unë dua djalin, ajo më intereson. Ata persona nëse e kanë djalin gjallë të ma lëshojnë, pasi nuk do të kenë anjëlloj problemi me policinë”

Mariglen Gjonaj  nxënës i klases së 10-të në Gjimnazin e Mamurrasit, është nisur si çdo mëngjes për në shkollë por nuk u kthye më, ndryshe nga herët e tjera atë ditë nuk kishte telefon me vete. Të shqetësuar familjarët kanë bërë menjëherë denoncimin në polici, por uniformat blu të Kurbinit ende nuk kanë arritur të bien ne gjurmët e adoleshentit edhe pse kanë marrë në pyetje disa persona. Ndërkohë ankthi i familjarëve për fatin e 16-vjeçarit të humbur vazhdon të rritet çdo ditë.