Aeroporti Kukësit është rasti kur aksionet i shërbejnë vetëm propagandës, dhe kjo e fundit pushtetit!

Nga Alban Daci

Çdo ditë bëhet një lajm apo një status për aeroportin e Kukësit. Madje, aq me ngulm shkoi puna e mbarimit të këtij aeroporti sa u improvizua ulja e një avioni që në fakt nuk u ul kurrë në atë pistë.

Po pse kaq shumë interes për këtë aeroport? Së pari, ky aeroport nuk është pjesë e një studimi të mirëfilltë për zhvillimin ekonomik të Kukësit apo të Lumës. Pra, që në fillimet e veta ky aeroport nuk është rezultat i një projekti të përgjithshëm për zhvillimin ekonomik dhe urban të zonës, por ai erdhi si pasojë e ngjarjeve që nuk ishin parashikuar siç ishte lufta e Kosovës dhe eksodi apo gjenocidi serb mbi popullatën shqiptare të Kosovës. Ky aeroport ishte nevojë humatire dhe u bo rezultat propagande për interesa oligarkësh.

Së dyti, ky aeroport praktikisht është mbaruar dhe duhet të kishte hyrë në funksionim që në vitet 2000, por s’ka qenë interes i politikës dhe i oligarkëve. Pra, sidomos ky pushtet nuk ka qenë i interesuar për perfundimin e kësaj vepre, sepse interesat ishin në sektor të tjerë, ku ishte më e lehtë për të vjedhur e për të marr perfitime.

Së treti, ky aeroport për nga dimensioni dhe për nga roli që do të ketë, në vendet e tjera bën pjesë tek gjerat normale që i kanë ndërtuar që në fillim te viteve ’60. Mos, mendoni se Kukësi do të bëhet konkurent me aeroportin e Londrës, Romës, New York-ut apo të Stambollit. Do të jetë një aeroport krejt normal i ndonjë kompanie low coste dhe nëse nuk shoqërohet me një projekt serioz plotësues zhvillimi të zonës, mund të kthehet shpejt në një aeroport të braktisur që nuk do të ulet e ngrihet asnjë avion.

Me ngulm po na thonë këta të qeverisë se në prill do te nisin fluturimet në Kukës. A thua se me këto fluturime do të marrin fund hallet e Kukësit?!Jo më jo edhe pas këtyre fluturimeve kuksianët do të vazhdojnë të jenë varfër, të papunë, por do e kenë më te lehtë ndoshta për tu larguar jashtë shtetit, sepse do ju kaloj ndonjë avion i rastit në pragun e shtëpisë e s’do të kenë nevojë për të shkuar deri në Tiranë.

Aeroporte kanë edhe vende si Kolumbia, Meksika e vende të tjera të Amerikës Latine, por në to ulen e ngrihen kryesisht avion që bëjnë trafiqe droge e armësh. E gjithë historia e aeroportit të Kukësit duket se është historia e një propagande të një pushteti që është ngritur e tenton të qëndroj mbi aparencën dhe nuk është interesuar kurre për esencën.

Kukësi nuk ka aq shumë vota sa ta shpëtoj këtë regjim, por padyshim është pjesë e panoramës se përgjithshme të një regjimi të ngritur mbi themele të vendosura në rërën e propagandës dhe kjo e fundit është vetëm në shërbim të pushteti që kthehet në interesa e privilegje për një pakicë që nuk kanë lidhje as me stilin e jetës së banorëve të Lumës e as me hallet e tyre të një varfërie të pamerituar dhe ndëshkuese padrejtësisht.