Aksidentet e shumta, Policia e Tiranës shton kontrollet në të gjitha rrugët e kryeqytetit

Tre aksidentet janë shënuar në pak orë në kryeqytet vetëm ditën e sotme, ku njëri prej tyre ka lënë të plagosur një çift bashkëshortësh dhe foshnjën e tyre tre muaj. Mësohet se Policia e Tiranës ka shtuar kontrollet në të gjithë rrugët e kryeqytetit me qëllim rritjen e sigurisë dhe rendit publik.

Shpejtësia tej normave të lejuara, mos respektimi i semaforit dhe manovrat e gabuara, janë ndër faktorët kryesorë që janë bërë burim aksidenti.

Drejtori Gledis Nano, ka urdhëruar ngritjen e një grupi inspektimi nga Departamenti i Sigurisë Publike për të kontrolluar, analizuar dhe evidentuar mangësitë, si dhe për të marrë masa konkrete ndëshkimore, për personat përgjegjës për aksidentet e ndodhura, apo për rezultate të dobëta në punë.

Drejtori i Përgjithshëm i Policisë së Shtetit kërkon edhe njëherë bashkëpunimin e qytetarëve që të denoncojnë çdo shkelje të rregullave të qarkullimit rrugor, si dhe të denoncojnë çdo abuzim me detyrën të punonjësve të Policisë Rrugore, apo për mosveprim a plogështi në veprime, duke i siguruar për reagim të menjëhershëm dhe të ashpër, ndaj çdo drejtuesi mjeti dhe ndaj secilit punonjësi Policie, që me mosveprimet e tij, cënon rëndë sigurinë e jetës në rrugë.

Njëkohësisht Nano falenderon median dhe inkurajon ato që të bëjnë publike çdo shkelje të rregullave të qarkullimit dhe të kontribuojnë së bashku në rritjen e parametrave të sigurisë në rrugë.

Prej orës 20:00 në të gjithë vendin kanë nisur kontrolle intensive, patrullime e monitorime, që do jenë të përditshme dhe jo me fushata, duke përdorur të gjitha mjetet logjistike bashkëkohore, që tashmë Policia Rrugore ka në përdorim.