Alibeaj: Me vulë apo pa vulë, do ndjek parimet e mia

Enkelejd Alibeaj thotë se do të pranojë pa asnjë koment publik ose jopublik vendimin e gjykatës së Apelit për vulën e partisë. I pyetur nëse do bashkohet me Partinë Demokratike nëse gjykata vendos t’ia japë vulën Sali Berishës, Alibeaj u përgjigj se do t’i qëndrojë deri në fund parimeve që beson, pavarësisht vulës.

“Ne do të pranojmë verdiktin që do të japë gjykata për të këtë çështje, ky është shembulli që i duhet dhënë publikut. Modeli politik që duhet dhënë është të mos paragjykohet, shantazhohet sistemi i drejtësisë. Ne nuk kemi për të bërë asnjë lloj sulmi ndaj gjykatës, do pranojmë pa asnjë lloj komenti vendimin e Apelit… Unë nuk jam nga ata që shkojnë pas vulës, shkoj pas vlerave, u qëndroj fakti që sot shqiptarët duan që Shqipëria të jetë e orientuar qartësisht në kursin euroatlantik, që nuk duan një kastë të korruptuar, që duan të kenë besim te drejtësia. Me vulë, pa vulë i qëndron dhe do t’i qëndroj deri në fund këtyre parimeve, asgjë nuk më josh. Çështja e vulës nuk është çështje e vlerave”, tha Alibeaj për Euronews.