Ankimuan masat e sigurisë, më 20 nëntor seanca për Berishën dhe Malltezin në Apelin e GJKKO

Ankimet e Sali Berishës dhe Jamarbër Malltezit për masat e sigurisë do të shqyrtohen nga Apeli i GJKKO më datë 20 nëntor ora 09:00. Gjyqtarja Iliriana Olldashi që do të shqyrtojë ankimet.

“Gjykata e Posaçme e Apelit për Korrupsionin dhe Krimin e Organizuar, më 14.11.2023, regjistroi çështjen penale nr. 56 akti, datë 14.11.2023 regjistrimi, mbi ankimin e personave nën hetim S.B. dhe J.M., me objekt: “Ankim ndaj vendimit nr. 112, datë 20.10.2023 të Gjykatës së Posaçme të Shkallës së Parë për Korrupsionin dhe Krimin e Organizuar” që ka disponuar në lëndë të masave të sigurimit personal. Sipas shortit, trupi gjykues monokratik përbëhet nga gjyqtarja Iliriana Olldashi. Seanca gjyqësore jopublike është caktuar për më datë 20.11.2023, ora 09:00”, thuhet në njoftim.