Arrestimi i aktivistëve në Mirditë, Zaimi: Sulm politik ndaj Lëvizjes VETËVENDOSJE

Pas arrestimit të 20 personave sot në Mirditë, midis të cilëve 11 janë aktivistë të lëvizjes VV, ka reaguar dhe anëtari i VV-së, Arbër Zaimi. Ai thotë se dy janë arsyet e arrestimit, ku e para sipas tij është se nën pushtetin e Ramës shtypja është bërë një lëvizje e zakonshme, dhe e dyta e konsideron si një sulm politik ndaj VV-së.

”E dyta sulmi politik ndaj Lëvizjes VETËVENDOSJE! e cila trimëron komunitetet dhe nxit organizimin e tyre përballë pushtetit. Ndalimi i aktivistëve të LVV tregon se pushteti nuk dëshiron “shqetësime” të tilla. Por ne nuk ekzistojmë për të kënaqur pushtetin”,-u shpreh Zaimi.

Ditën e sotme banorët në fshatin Thirre të Njësisë Administrative të Fanit, dolën për të protestuar kundër ndërtimit të një hidrocentrali në zonën e tyre. Ata janë shprehur se u janë falsifikuar firmat dhe nga ndërtimi i këtij heci kanë dëme të shumta. Banorët kanë zgjedhur të protestojnë duke u mbledhur dhe me pankarta në duar. Në mbështetje të tyre kanë ardhur edhe banorët e Zallë Gjoçajt. Banorët e Mirditës kanë kundërshtuar prej kohësh ndërtimin ndërtimin e HEC-eve, ku sipas tyre ato mund të shkaktojnë dëme të mëdha në këtë zonë.