Arrestimi i Amant Josifit, reagon Policia: Kërkohej për mashtrim, krim kibernetik dhe skema piramidale

I shpallur në kërkim nga autoritetet spanjolle, Amant Josifi është arrestuar në Dubai. Autoritetet shqiptare i kanë kërkuar informacion më të detajuar atyre spanjolle në lidhje me arrestimin e tij.

”Ky shtetas ishte shpallur në kërkim ndërkombëtar, pasi Gjykata e Shkallës së Parë e La Seu de Urgell, Spanjë, me vendimin nr. 2, të datës 03.11.2022, i ka caktuar masën e sigurisë “Arrest në burg”, për veprat penale “Mashtrime me rrethana rënduese”, “Krim kibernetik”, “Skema piramidale” dhe “Organizata kriminale”, të parashikuara nga Kodi Penal spanjoll”,-informon Policia e Shtetit.

Grupi kriminal i emërtuar si (OCG) dyshohet se është përfshirë në mashtrime përmes investimeve online me kriptomonedha. Grupi kriminal përdorte Call Centera dhe platforma të tjera online si Absolut Global Markets, AurumPro, Finaxis, SNP Broker, CapitalMarketsBanc etj, dhe mashtronte qytetarët që të investonin online përmes kriptovalutave.