Arrestohen 5 shqiptarë në kufirin e Kapshticës. Si u zbuluan nga policia greke

Policia greke ka arrestuar në zonën kufitare pranë Kapshticës 5 shtetas shqiptarë nën akuzën e trafikut ndërkombëtar të lëndëve narkotike.

Sipas policisë helene, shërbimet e saj kufitare kanë gjetur në një zonë me shkurre të dendura pranë doganës së Kapshticës, 5 çanta të mëdha, brenda të cilave ndodhej sasia prej 68 kg kanabis sativa dhe 2 kg kanabis e përpunuar në formë çokollate.

Menjëherë në zonë janë vendosur patrulla dhe sapo një grup i përbërë prej 5 personash i ka marrë çantat, menjëherë shërbimet policore greke ndërhynë duke i arrestuar.

Prej verifikimit rezultoi se të gjithë shtetasit e ndaluar kishin kaluar në mënyrë të jashtëligjshme kufirin mes dy vendeve, ndërsa 3 prej shqiptarëve rezulton se kishin të ndaluar hyrjen në zonën Shengen.

Të arrestuarit janë të moshave 22-41 vjeç dhe janë banorë të zonave kufitare pranë Greqisë.

Të arrestuarit do të dërgohen në gjykatë për masë sigurie.