Arrestohet Albin Kurti

Policia e Kosovës ka arrestuar liderin e "Vetëvendosje"-s, Albin Kurti për të cilin kishte mandat arresti nga gjykata.

Kështu, deputeti i Kuvendit të Kosovës, pas përfundimit të marshimit protestues, ka mbërritur në selinë e partisë. Edhe pse është në kërkim, ai mori pjesë në proteste.

Menjëherë pas mbërritjes së Kurtit, selia është rrethuar nga forcat speciale, për ta arrestuar, duke zbatuar urdhër-arrestin e nxjerrë ditë më parë nga gjykata.

Policia ka hyrë në seli dhe ka arrestuar disa aktivistë, bashkë me ta edhe Kurtin.

Më parë, zëdhënësi i "Vetëvendosje"-s, Frashër Krasniqi kishte provokuar Policinë e Kosovës, duke shkruar në Facebook se policia nuk ka guxim ta arrestojë Kurtin.