Arrestohet drejtori i Policisë Pyjore në Durrës
Arrestohet drejtori i Policisë Pyjore në Durrës. Artur Baku është prangosur mesditën e sotme nga forcat policore.
Burime nga policia thanë për SYRI.net se Baku akuzohet për “shpërdorim detyre”.
Deklarata e Policisë së Durrësit:
Nga Specialistët për Krimet në Komisariatin e Policisë Krujë, u bë e mundur arrestimi i shtetasit:
Artur Baku 42 vjeç, banues në Tiranë, Drejtori Rajonal i Policisë Pyjore Durrës.
Arrestimi i këtij shtetasi, u bë pasi:
Më datë 22.11.2015 nga ana e Patrullës së Përgjithshme është bërë e mundur arrestimi në flagrancë i shtetasit:
Lirim Ndregjoni, 24 vjeç, banues në Luz Fushë-Krujë.
Shtetasi i mësipërm, u kap duke drejtuar mjetin tip Furgon me targa KR 6809 K, të cilën e kishte ngarkuar me lëndë drusore, pa dokumente përkatëse duke i shkarkuar në picerinë e tij.
Shtetasi i mësipërm, ka deklaruar që lëndën drusore e kishte marrë në pikën e bllokimit të pyjores në lagjen” Grumbullimi” Fushë Krujë me lejen e shtetasit Artur Baku.
Nga veprimet hetimore të kryera, ka rezultuar se shtetasi Artur Baku, pasi bllokonte lëndët drusore në pikën e bllokimit në vendin e quajtur lagjia”Grumbullimi” Fushë- Krujë u’a shiste personave të ndryshëm duke shpërdoruar detyrën, pasi nuk dispononte liçensë apo kasë fiskale për shitjen e tyre.
Materialet i kaluan Prokurorisë së Rrethit Gjyqësor Krujë për veprime të mëtejshme për veprën penale “Shpërdorimi i detyrës”.