Arrestohet kapiteni i portit në Shëngjin

Shërbimi për Çështjet e Brendshme dhe Ankesat, në Drejtorinë e Policisë së Lezhës, ka ekzekutuar vendimin e Gjykatës së Shkallës së Parë Durrës, për Shkëlqim Celamin, me detyrë Kapiten në Kapitenerinë e Portit Detar Shëngjin.

Ai akuzohet për veprën penale të “Korrupsionit pasiv të personave që ushtrojnë funksione publike”.

Gjithashtu, u ekzekutua urdhri i ndalimit i Prokurorisë pranë Gjykatës së Shkallës së Parë Durrës, për Reoland Lekaj, pronar i mjetit lundrues “SARDA”, për veprën penale “Ushtrim i ndikimit të paligjshëm ndaj personave që ushtrojnë funksione publike”.

Ndërkohë u shpall në kërkim shtetasi B.Ç., me detyrë punonjës i Policisë në Drejtorinë e Policisë Kufitare dhe Migracionit Durrës, për veprën penale “Ushtrim i ndikimit të paligjshëm ndaj personave që ushtrojnë funksione publike”.

Ndaj këtij punonjësi policie, Gjykata e Shkallës së Parë Durrës ka dhënë masën e sigurimit personal “Arrest me burg”.

Nga një hetim 4-mujor, proaktiv, në bashkëpunim me Prokuroritë e Rretheve Gjyqësore Lezhë dhe Durrës, duke vënë në përdorim metodat speciale të hetimit, rezultoi se punonjësi i Policisë me iniciale B.Ç., në bashkëpunim me shtetasin Reoland Lekaj kanë ushtruar ndikim të paligjshëm ndaj shtetasit Shkëlqim Celami, i cili ushtron detyrën e Kapitenit në Kapitenerinë e Portit Detar Shëngjin, për lëshimin në mënyrë të kundraligjshme të Dëshmisë së Aftësisë së Lundrimit për mjetet e vogla, në favor të shtetasit Reoland Lekaj, pronari i mjetit të lundrimit “SARDA”.

Kundrejt shpërblimit prej 3000 euro, të dhëna nga shtetasi Reoland Lekaj, me ndërmjetës punonjësin e Policisë B.Ç., kapiteni Celami krijoi favore për lëshimin në liqenin e Vaut të Dejës me dokumentacion jo të përshtatshëm të mjetit lundrues “SARDA”.

"Mjeti i lundrimit së bashku me certifikatën e Dëshmisë së Aftësisë së Lundrimit, me vendim të organit të Prokurorisë, janë sekuestruar në cilësinë e provës materiale", thuhet në njoftimin e Ministrisë së Brendshme.