Artan Lame: Në dy vite ALUIZNI, sot Kadastra ka legalizuar 7100 apartamente dhe 620 mijë m2 ndërtim në Tiranë

Drejtori i Përgjithshëm i Agjencisë Shtetërore të Kadastrës Artan Lame ka qenë pjesëmarrës gjatë një ceremonie për shpërndarjen e lejeve të legalizimit të një pallati të braktisur nga investitori.

“Me gjithë pallatin e sotëm shkojmë rreth 7100 apartamente të legalizuara vetëm në Tiranë nga pallatet e braktisura me rreth 620.000m2 ndërtim të cilat ishin të mbetura si plaçkat e kasapit, sepse askush nuk i dilte për zot, përveç mijëra qytetarëve që vinin vërdallë për të legalizuar pallatin”, është shprehur Lame.

Drejtori i Kadastrës shfrytëzoi sërish një aktivitet të tillë për të bërë thirrje gjithë qytetarëve që janë në pallate të braktisura që të bëhen bashkë për të vijuar me procesin e legalizimit dhe hipotekimit të objektit.

Po ashtu Lame ju kërkoi qytetarëve që t’i drejtohen agjencisë dhe jo sekserëve për të mbyllur procesin.

“Lejet e legalizimit, regjistrimin, certifikimin, legalizimin e pallateve, regjistrimin e pronave në Kadastër i bëjnë vetëm punonjësit e Kadastrës. Mos u merrni me lloj-lloj sekserësh qe vinë si hijena poshtë e përpjetë. Merruni vetëm me punonjësit e kadastrës”, shtoi Lame.

Në këtë takim ishin të pranishëm drejtori i ASHK-së Tirana Jug Mariglen Disha, administratori i njësisë administrative Florian Pullazi dhe deputetja e zonës Vasilika Hysi. Ajo tha se pas legalizimit të këtij objekti po presin për tu legalizuar dhe hipotekuar edhe 20 pallate të tjera.