Atentati ndaj kryebashkiakut të Lushnjes, Alibeaj: Prishje pazaresh, e morën “dhuratë” pushtetin

Autori i atentatit me granatë ndaj kryebashkiakut të Lushnjes Fatos Tushe dhe sekretares së tij vijon të jetë në arrati.

Ndërkohë nga policia ende nuk ka një deklaratë zyrtare nga për shkaqet që çuan në ngjarjen e rëndë.

Për demokratët çështja lidhet me prishjen e pazareve.

Ish-deputeti Enkelejd Alibeaj i ftuar në RTV Ora thotë se gjithçka është pasojë e zgjedhjeve monopartiake të 30 qershorit dhe parajmëron të tjera situate të ngjashme në të ardhmen.

Alibeaj: Nuk ka për të pasur asnjë deklaratë nga policia. Është çështje kryekëput prishjesh pazaresh. Një pushtet qoftë edhe bashkiak i fituar pa zgjeshje si ato të 30 qershorit, i fituar në presionin apo joshjen e parave të çojnë këtu. Askush nga kryetarët e bashkive që janë sot në detyrë nuk e konsiderojnë qënien në detyrë si një djersitje gjatë fushatës elektorale dhe borxhi moral dhe politik ndaj qytetarëve. E kanë marrë të dhuruar, pa garë, pa proces dhe për këtë arsye të tilla ngjarje do të kësh. Abuzimi me pushtetin do të kapë majat dhe skandalet do të jenë po të tilla. Shumë shpejt do të dëgjoni edhe të tjera.