Austria pro anëtarësimit në BE: Shqipëria e meriton, do e mbështesim

Austria mirëpret hapjen e negociatave të pranimit me Shqipërinë dhe Maqedoninë dhe integrimin e shpejtë të të gjitha vendeve në Ballkanin Perëndimor në BE. Kancelari Austriak Sebastian Kurz e shprehu këtë qëndrim gjatë prezantimit te prioriteteve të presidencës gjashtë mujore të Bashkimit Europian në Strasburg.

https://www.facebook.com/balkanwebCOM/videos/1759696660745950/?t=0

“Një tjetër çështje që presidenca austriake ka për zemër është Europa Juglindore dhe veçanërisht Ballkani Perëndimor. Në këndvështrimin tonë, Bashkimi Europian do të jetë i plotë vetëm kur vendet e Ballkanit Perëndimor të jenë bërë pjesë e komunitetit të kombeve tona. Ballkani Perëndimor jo vetëm që ka një perspektivë europiane, të cilën këto vende e kanë fituar dhe e meritojnë, por ato meritojnë gjithashtu anëtarësimin në Bashkimin Europian. Ndaj, presidenca austriake do të bëjë më të mirën për të mbështetur procesin e anëtarësimit të këtyre vendeve në BE”, ka deklaruar Kurz.

Padyshim që pjesa më e rëndësishme e prezantimit të tij kishte të bënte me çështjen e emigracionit të paligjshëm me të cilën po përballet Bashkimi Europian. Sipas analistëve, nuk bëhet fjalë për një krizë emigracioni pasi ajo nuk është aq e theksuar sa në vitin 2015, por bëhet fjalë për një krizë politike mes vendeve të unionit.