Balla, kërkesë zyrtare prokurorisë: Dosja e CEZ t’i kalojë SPAK

Një ditë para se SPAK të niste punën, prokuroria mbylli hetimet për dosjen e shitjes së kompanisë CEZ. Ky hetim kishte nisur nga ana e prokurorisë pas një hetimi disamujor të një komisioni parlamentar hetimor.

Por mazhoranca socialiste që kërkoi hetimin parlamentar nuk është e kënaqur me vendimin e prokurorisë dhe për këtë arsye, kreu i grupit parlamentar socialist, Taulant Balla kërkoi që kjo dosje t’i kalojë SPAK dhe gjykatës kundër krimit të organizuar dhe korrupsionit.

Në shkresë e hartuar nga socialistët si argument mbështetës theksohet fakti se Komisioni Hetimor i Kuvendit, ka arritur në përfundimin se një sërë zyrtarësh të lartë të shtetit shqiptar gjatë viteve 2005-2013, duke qenë persona që ushtronin funksionet më të larta publike me veprime aktive dhe mosveprime, kanë synuar dhe realizuar ardhjen e pasojave të kundraligjshme gjatë procedurave të privatizimit të Operatorit të Sistemit të Shpërndarjes, negocim të marrëveshjes së shitjes së aksioneve.