Bardhi i përgjigjet Nokës: Mjaft me historinë e pengut

Sekretari i Përgjithshëm i Partisë Demokratike, Gazment Bardhi në një konferencë për shtyp u kundërpërgjigj ndaj deputetit Flamur Nokës, i cili më parë e kishte cilësuar kreun e PD-së Lulzim Basha, si “pengkryetar”.

“Historitë me pengje dhe pengmarrje do të duhet t’i bëjnë me seriozitet sepse po i flasin demokratëve në një moment të vështirë për ta. Ne e kemi për detyrim që të respektojmë sakrificën e tyre. Hallet e tyre personale t’i mbajnë larg selisë së partisë dhe mbështetësve”, deklaroi Bardhi.

Në lidhje me 4200 firmat për mbledhjen e Kuvendit Kombëtar, Bardhi tha ”Nëse i kanë firmat, t’i depozitojnë në protokollin e Partisë Demokratike. Jeni vetë dëshmitarë, që deri në këto moment, në zyrën e protokollit nuk ka asnjë firmë të depozituar. Firmat nuk sillen me kuti të mbyllura dhe të thuhet “futini në kasafortë” në zyrën e kreut të Këshillit Kombëtar (Edi Paloka). Kryetari i Këshillit nuk ka zyrë, nuk ka as administratë dhe as staf për të kryer procese”.