Bashkëpunimet shqiptaro-amerikane në biznes, një histori suksesi

Qendra më e madhe tregtare në Shqipëri, TEG, ka 10 vjetorin e saj të themelimit këtë vit. I ndodhur në një nga zonat më të qeta të Tiranës, Tirana East Gate tashmë është shndërruar në një simbol të qytetit. Qendra shërben jo vetëm si një vend-ndodhje e preferuar për blerje, por edhe si një pikë takimi për të kaluar kohën e lirë në mbi 95 mijë metrat katrore dhe 150 dyqanet e saj.

Të gjithë e njohin TEG por shumë pak e dinë që pas suksesit të TEG qëndron një bashkëpunim shqiptaro-amerikan. Grupi BALFIN dhe Fondi Shqiptaro-Amerikan i Ndërmarrjeve (Albanian-American Enterprise Fund) kanë bashkuar idetë dhe forcat në krijimin e një prej qendrave tregtare më të suksesshme të rajonit.

Në këtë 10 vjetor të TEG dy bashkë-drejtuesit e Fondit shprehen pozitiv për suksesin e TEG si biznes dhe atë çfarë i ofron qytetit të Tiranës e më gjerë. Aleksandër Sarapuli, bashkë-drejtues i AAEF-së tregon për bashkëpunimin me Grupin BALFIN dhe çfarë i bashkon.

“Ajo çka na ka lidhur me BALFIN ishte vizioni, eksperienca e Grupit, standardet më të larta të zhvillimit të biznesit, që e krahason me çdo grup tjetër evropian apo dhe të botës. Ka shumë ide të mira mbi të cilat po diskutojmë, si në projektet me impakt social në edukim, ashtu edhe në sipërmarrje. Bashkëpunimi ynë është i vazhdueshëm, pasi Grupi BALFIN është gjithnjë ideator i ideve të reja dhe inovatore në treg” – u shpreh ai.

Të dy partnerët e TEG po shikojnë ta shtrijnë bashkëpunimin edhe në fusha të tjera. Përveç fokusit në zhvillimin e sipërmarrjes në vend ka vend edhe për investime sociale.
Edhe Martin Mata, si bashkë-drejtues i AAEF-së,, është në këtë linjë. “Te BALFIN kemi gjetur një kompani me vizionin për të krijuar vlera nëpërmjet investimeve ku hynin. Përqasja e përbashkët që nga z. Mane deri të punonjësi me i thjeshte, ka bërë që mënyra se si kemi bashkërenduar sinergjitë ka qene çelësi i suksesit. Balfin është ndër Grupet e pakta që ka arritur të strukturojë filantropinë. Dhe në këtë fushë ne jemi duke folur me drejtuesit për t’iu bashkuar iniciativave, që AADF i ka si mision të vetin për t’i sjellë në Shqipëri,” deklaroi ai.

Përveç TEG, Grupi BALFIN dhe AAEF kanë bashkëpunuar edhe në sjelljen e një koncepti inovator për Shqipërinë. Parku Logjistik i Tiranës, TLP, u ndërtua falë vizionit të përbashkët që kishin të dy partnerët për t’i ofruar bizneseve të vendit shërbime logjistike të një standardi ndërkombëtar. Grupi BALFIN është një nga grupet më të rëndësishme dhe më të suksesshme të investimeve në Ballkanin Perëndimor, i themeluar në vitin 1993 në Vjenë nga Samir Mane, dhe aktualisht ndodhet dhe operon në 7 shtete në Ballkan dhe Evropën Perëndimore me aktivitet në zhvillimin dhe menaxhimin e pasurive të paluajtshme, shitjet me pakicë, industrinë minerare, sistemin bankar, turizmin, energjinë, apo logjistikën.

Fondi Shqiptaro-Amerikan i Ndërmarrjeve u krijua në 1995, me qëllimin kryesor që të promovojë zhvillimin e sektorit privat në Shqipëri. Fondi ka investuar direkt rreth 110 milionë dollarë në 77 investime në 40 shoqëri. Mbi 7.000 vende të reja pune janë krijuar dhe mbi 2 miliardë dollarë janë kontribuar në PBB-në e Shqipërisë. Në vitin 2009 Fondi krijoi organizatën e vet të trashëgimisë, Fondacionin Shqiptaro-Amerikan për Zhvillim (AADF). Fondacioni si një organizatë jofitimprurese, vijon të kontribuojë në projekte sfiduese me impakt ekonomik, social dhe shoqëror në të gjithë Shqiperinë.