Vetëm disa sekonda pasi deputeti i PS-së Ben Blushi nisi fjalimin e tij në Kuvend, grishjes me zë të lartë të kamerierit për ta ndjekur i përgjigjen pa përjashtim demokratët, gazetarët dhe qytetarët që pinin kafe për qejfin e tyre në lokalin që gjendet në oborrin e “selisë blu”. Ende pa u sistemuar mirë në tavolina, njëri nga dera e lokalit, me dialekt verior urdhëron: “Ngrije pak zanin”. Për më shumë se tre minuta brenda lokalit të PD-së nuk pipëtinte njeri veç Ben Blushit. Heshtja e vënë nga deputeti socialist “prishet” nga fjalia: “Ky po që është opozitar dhe jo këta tanët”. Edhe pse në parim të gjithë janë dakord me atë që tha simpatizanti demokrat, ajo sërish nuk u përtyp krejt kollaj nga disa prej demokratëve që ndodheshin aty. Fraza që lëshoi ai ishte më djegëse se vet fjalimi i Blushit, dhe demokrati pas ca sekondash u mundua ta ndreqë duke thënë: “Vetëm për këtë dhe Berishën vlen të ndiqet Kuvendi”.

As krahasimi me liderin shpirtëror të demokratëve nuk arriti të thyejë zymtësinë që solli deklarata e tij me zë të lartë. Ndërkohë që Blushi vijonte të shfrynte, siç di vetëm ai, duke i rënë pa asnjë kursim krerëve të partive për kriminalizimin, që sipas tij është përgjegjësi e drejtpërdrejtë e tyre, lokali i PD-së tashmë është mbushur gati i gjithi. Aty nga mesi i fjalimit të Blushit, në tavolinën  ku qenë mbledhur gazetarët që mbulojnë akvitetet e të djathtës thyhet heshtja. “Këtij nuk ke se çfarë t’i heqësh. Është gjynah të mos e botosh të gjithën pa i prekur asnjë radhë”, thotë Juxhini, njëri prej gazetarëve. Blushi politikan kishte tërhequr edhe vëmendjen e dy kamarierëve dhe dy banakierëve. Të gjithë duke ndjekur fjalimin me patos të socialistit që sulmonte kreun e socialistëve, veçmas.

Edhe kreu i bashkisë së Kamzës, Xhelal Mziu, i ulur në një vend të veçuar nga turma dhe larg televizorit ndiqte me shumë interes fjalimin antiqeveritar të deputetit të PS-së. Fjalimi i tij shoqërohet me duartrokitje të një prej demokratëve dhe me vlerësime pafund për gati një orë. Dy minuta pasi Blushi mbaroi fjalimin e tij, nga porta e Kuvendit shihen duke dalë pjesa më e madhe e ligjvënësve demokratë. Por ndryshe nga të enjtet e mëparshme ata preferuan të futen në “selinë blu”, duke i ikur përballjes me simpatizantët e kafenesë së PD-së. “Dhe deputetët e PD-së duket e kanë kuptuar se Blushi i tha të gjitha”, komentohet nga një demokrat ikja e tyre nga kuvendi. Ndërsa një tjetër shton: E patë që fjalimi i Blushit detyroi disa socialistë e demokratë të uleshin në radhët e fundit të sallës së parlamentit, larg kamerave. Më duket se ishte dhe Berisha nga fundi. Kjo ishte kafe e hidhur për të gjithë”‎.

Në fakt ajo ishte si një kafe e hidhur.  E fortë, por që e jep efektin, të zgjon, të shkund. E tillë që dhe mund të mos shijojë, por të duhet, “ta do trupi” për të qenë esëll. E ndoshta këtë shije la te demokratët ai fjalim, që ndoshta ia dinin fjalët, por nuk arritën t’i formulonin. Entuziazmi për fjalët e deputetit socialist u venit pak pas përfundimit, pasi ndoshta janë parë në sy si për t’i thënë njëri -tjetrit: ti s’munde ta bëje. Ndoshta shumë simpatizantë demokratë brenda dhe jashtë oborrit të SHQUP-it do të donin një deputet të tillë  antiqeveritar që e djathta s’po arrin të prodhojë. Ose për tu treguar pak më altruistë, ndoshta mund të jetë, por askush s’e lë të flasë, pasi për fat të keq, shpesh “demokracia” mbetet thjesht një fjalë.

Fjalimi i Blushit në Parlament

Deputeti i Partisë Socialiste Ben Blushi ka shfrytëzuar debatet e ligjit për dekriminalizimin për të hedhur në parlament në mënyrë të hapur akuza të reja kundër Edi Ramës. Megjithëse ka deklaruar votën pro ligjit ai e ka quajtur atë: “Një ligj i paplotë dhe i pazbatueshëm deri sa burimi që solli kriminelët në parlament është vetë i papastër”. Deklarata e Blushit ka qenë e qartë sepse edhe herë të tjera ai e ka akuzuar shefin e PS-së për futjen e kriminelëve në kuvend dhe përdorimin e tyre si për të luftuar kundërshtarët politikë, po ashtu edhe ata brenda llojit.

Blushi ka bërë një paralelizëm të qartë kur deklaroi se: “Njerëzit me të shkuar kriminale këtu nuk erdhën me votat e tyre. Ata iu imponuan Shqipërisë me forcë duke u futur në listat e partive tona. Kjo damkë nuk do t’i ndahet këtij Kuvendi ndoshta për disa dekada dhe nuk me vjen fare keq te them se këtu përgjegjësia nuk është kolektive, por është vetëm personale. Është e atyre që i sollën këtu duke i trafikuar, duke i korrektuar, duke i zbukuruar dhe duke i parfumosur për ta kthyer shëmtinë në normë. Të jesh i fortë dhe i paprekshëm është kthyer në mode. Kjo modë rrezikon të infektojë, shoqërinë tonë dhe kryesisht të rinjtë. Çfarë i themi ne të rinjve të Shqipërisë duke zgjedhur në poste publike njerëz të paarsimuar të cilët rrugën e jetës së tyre e kanë çarë duke shkelur ligjet shqiptare apo ndërkombëtare? Ja çfarë i themi: Mos përdorni mendjen, por muskujt”, është shprehur Blushi.