Benet Beci: Shkodra gati për Europianin U16, nis rinovimi i Pallatit të Sportit “Qazim Dervishi”

Në prag të Kampionatit Europian të Basketbollit për moshat U16, i cili do të zhvillohet këtë verë në Shkodër, Bashkia ka nisur punimet intensive në Pallatin e Sportit “Qazim Dervishi” për të garantuar kushte optimale për sportistët dhe pjesëmarrësit.

Kryetari i Bashkisë së Shkodrës, Benet Beci, përmes një postimi në rrjetet sociale me hashtagun #bashkianëpunë, bëri të ditur se punonjësit e Drejtorisë së Menaxhimit të Objekteve Publike janë angazhuar në përmirësimin e infrastrukturës së brendshme të pallatit. Ndër punimet kryesore janë përmirësimi i parketit të fushës së lojës, rinovimi i dhomave të zhveshjes dhe vënia në funksion e sistemit të kondicionimit të ajrit në të gjithë ambientin.

Gjithashtu, parashikohet rishikimi i ndriçimit sportiv dhe i sinjalistikës brenda sallës, me synimin për të përmbushur standardet e kërkuara për një aktivitet të nivelit europian. Shkodra pritet të mirëpresë dhjetëra ekipe dhe të rinj nga vende të ndryshme, duke e kthyer qytetin në një qendër të rëndësishme sportive gjatë kësaj vere.