Berisha: Rama ka marrë kredinë më të madhe në histori, e ktheu Shqipërinë në narko-shtetin e parë në Europë

Nga ”Foltorja” në Dibër, ish-kryeministri Sali Berisha ka akuzuar Ed Ramën, duke thënë se përgjatë tetë viteve të shkuara në pushtet krijoi narkoshtetin e parë në Europë, duke shtuar se sot varfëria e skajshme është 360% më e madhe sesa ç’ishte në 2010. Për të Rama ka marrë 700 mln euro borxh, ku e quan si borxhin më të lartë në historinë e Shqipërisë.

”Regjimi i Edi Ramës në mënyrë tmerrësisht të dëmshme për Shqipërinë ndërtoi në këto tetë vite në vend të shtetit ligjor, shtetin e drogës dhe krimit, narko-shtetin e parë në Europë.

Ky regjim në këtë 8 vite jo vetëm që nuk përparoi standardet e demokracisë dhe nivelin e jetesës, por ç’bëri një shumicë të madhe prej tyre dhe shqiptarët realisht i zhyti në varfëri dhe mjerim.

Sot varfëria e skajshme është 360% më e madhe se sa ç’ishte në 2010. Sot shqiptarët nga kombi me rrogën mesatare më të lartë në rajon, marrin rroga 30% më të ulëta se në Kosovë. Sot vjedhja monstruoze në të gjitha fushat ka bërë që arka e shtetit të jetë bosh.

Qeveria detyrohet deri në treg për të marrë 700 mln euro borxh në një kohë kur ne na thotë se rritja ekonomike ishte 18%. Tregon përralla me mbret se të kesh një rritje edhe 8% nuk ka kurrë nevojë të shkosh të marrësh në banka kredinë më të madhe në historinë e vendit në një tranzh”.