Berisha: Rama si pushtues, 1.1 milionë shqiptarë kanë ikur nga vendi në 10 vite

Sali Berisha në një bashkëbisedim me të rinjtë e Forumit Rinor të PD-së këtë mbrëmje, tha se nga viti 2013 gjer më sot, në 10 vite, nga Shqipëria, sipas statistikave të Eurostat, u larguan në vendet e BE, 1.1 milionë shqiptarë, 80 përqind e tyre të rinj.

”A meritonte ky pushtues mallkim dhe urrejtje më të madhe për këtë që u bëri shqiptarëve? Këtë nuk ua bëri një pushtues shqiptarëve, këtë ua bëri një njeri”,-tha Berisha. Ai theksoi edhe më tej se qeveria iu ka vrarë shpresën të rinjve duke mos i lënë të votojnë të lirë.

“E patë! Nëse nuk i lë njerëzit të votojnë të lirë, ti u vret shpresën atyre. Në çdo vend, qeveria ka plus-minuset e saj, por në 4 vjet, qytetarët marrin vendimin e tyre. Kurse këtu, ajo bandë që patë, ka dhjetëra vrasje të regjistruara.

Ja pse ikin shqiptarët, sepse pushtetin nuk e ndërrojnë dot me votë, sepse vota e tyre diktohet nga krimi dhe vota e tyre shndërrohet në krim. Erdhi në pushtet përfaqësuesi i tyre, çfarë bëjnë tani? Janë vërsulur me tërbimin më të madh mbi Shkodër, të shpërblehen me pallate, të shpërblehen me resorte”, tha Berisha.