Berisha: S’do e lejoj Bashën të japë dorëheqjen, por do ta heqim. Me rininë do krijojmë opozitën e vërtetë

Nga “Foltorja” me të rinjtë në Tiranë, Sali Berisha tha se Lulzim Bashën do e heqin nga posti, dhe se nuk do të lejojnë që të japë dorëheqjen. “Nuk e lejoj me dhanë dorëheqjen por do ta heqim, s’do e lejojmë”. Kjo deklaratë është pritur me duartrokitje nga të rinjtë.

Ish-kryeministri Sali Berisha ishte si kurrë më parë në një takim me qindra e mijëra të rinj. Berisha shprehu besimin se bashkë me rininë shumë shpejt do të krijojë opozitën e vërtetë për rrëzimin e narkoshtetit të Edi Ramës.

“Kjo është foltorja më e rëndësishme, më vendimtarja, në përpjekje për një rindërtim të plotë të PD, për shndërrimin e saj në një opozitë të vërtetë opozita. Dhe ju garantoj se besimin tim e kam të bazuar sepse e di që ju jeni të rinjtë e idealeve më të pastra të shoqërisë shqiptare.

Unë e di se guximi juaj është më i madhi, më i pakufishëm se i gjithë të tjerëve. Ndaj besoj se kjo “Foltore” do të jetë një shtytje e madhe për mbarë shoqërinë dhe në radhë të parë për PD, e cila ndodhet në këto momente në një moment kritik.

Kam bindjen se së bashku do të krijojmë me shpejtësi opozitën e vërtetë shqiptare dhe njëlloj si 30 vite më parë nënat dhe baballarët tuaj përmbysën diktaturën komuniste, ne do të përmbysim narkoshtetin”, tha Berisha.