Berisha thirrje banorëve në Pogradec: Ngrihuni kundër kullave që po ndërtohen

Sali Berisha i bëri thirrje pogradecarëve të dalin kundër ndërtimeve të kullave që sipas tij po zhbëjnë identitetin e Pogradecit.  “Dhe u garantoj që, ato kulla që fillojnë aty, në qoftë se qytetarët nuk i dalin zot këtij qyteti, do të vazhdojnë deri në Tushemisht dhe kur të mbarojë ky territor do të kthehen nga Pogradeci në Lin”, tha Berisha.

Kryedemokrati i dha porositë grupit të punës për zgjedhjet e 2025 në Pogradec, i cili drejtohet nga Ivi Kaso. “Të uleni me çdo pogradecar, të sigurt në fitoren e 11 majit. Përmbysëm një diktaturë, do të përmbysim diktaturën e dytë, nuk ka fat më të madh për një njeri, fat më të madh për një gjeneratë se sa të përballet dhe të përmbysë një diktaturë”.

Këtë vit zgjedhor qarku i Korçës ka humbur një mandat deputeti për shkak të uljes së numrit të popullsisë. Në zgjedhjet parlamentare të 2021 demokratët arritën të merrnin 5 mandate, por këtë herë njëri prej deputetëve Selaudin Jakupllari është distancuar nga Berisha, duke lënë te hapur diskutimin nëse PD do ta rikuperojë apo jo këtë mandat.